چه روزیگاری درمون

بَه کو چه روزی دِرمون	روزیگاری خوری دِرمون
نه غم دِرمون نه غُصتَه	نه هیکل و نه جُثه
کَرگَه خروسی دِرمون	وَره و میشی دِرمون
خُمبَه پُر از نونی با	کی یِه بَر از نوری با
خویش و قومی صمیمی	هُمسایِه همه ای رونگی
هُمدیگرون قاطی بِن	کی یون بَری وایی بِن
ژون دِل پر از عاطِفه	بی غَلّ و غش، بی کینه
احترامی مَسینون	چه جِنی یون، چه میردون
دِنبالی کارین دَبِن	شو همه جَمَه مِبِن
دردی دلی کو دِرشون	خوشتون سرگرم ماکرشون
خوتون دِلَه او دِرمون	حوضچه و باغچه دِرمون
کرده کی بین و سوزی	شمعدونی بین وِلی
بعضی کی یِه گا درشون	شت و ماستی موخورشون
ژون همه چی تأمین با	اُشتر ژون گل کَسین با
ماستَه دوغو موخورشون	تندرستی خوری دِرشون
ژون شو نشینی خو با	خویشه قومون بَر وابا
ژون شو چره همن با	انجیلِته، شیکلِته
ویمی، یوزی و پِشتِنه	گُندم برشته نَخویِه
کشمشی بِن، تُخمی	چایی سماور جوش با
دوریژین هی واخا	لمپا بی یَه و فانوسی
نفتی چلا و کرسی	نونی کی یه و پیازی
فتیرین لا چِسکی	کِلینِه دیم قَلیفَه
هیزم تَیی هی پوف کَه	نه قبضی برقی دِرمون
نه قبضی گازی دِرمون	نه ماشینَه، نه بنزین
فقط دوست دِرشون خَرکین	ژین مِبِرشون دیمی رَز
حاصل ژین بار مِکرشون	ژین خوراک واش و یونجه با
ژین جا همیشه گرم با	نه سوخت کمی می یاردِش
نه اِن کو جوش می یاردِش	ژون همه چی تأمین با
اُشتر ژون گَل کسین با	عده ای بیچارِه دَبِن
اِن چیزایی ندرشون	آبری داری ماکرشون
خوشتون خرج گیر می یارشون	نمازی به وقت ماکرشون
شکری خُده ماکرشون	صدا بیرین مِنی یارشون
بَه کو چه روزی دِرمون	روزیگاری خوری دِرمون